سابق چیف جسٹس تصدق حسین جیلانی نے ججز کے الزامات کی تحقیقات کرنے والے کمیشن کی سربراہی سے انکار کردیا۔

اسلام آباد (92 نیوز) سابق چیف جسٹس آف پاکستان تصدق حسین جیلانی نے ججز کے الزامات کی تحقیقات کرنے والے کمیشن کی سربراہی سے انکار کر دیا۔

وزیر اعظم شہباز شریف کو ون مین انکوائری کمیشن کے نام سے لکھے گئے خط میں تصدق حسین جیلانی نے کہا کہ انکوائری کمیشن سپریم جوڈیشل کونسل کے دائرہ کار میں آنے والے معاملے کو نہیں دیکھ سکتا۔ انہوں نے مزید کہا کہ آرٹیکل 209 کے تحت انکوائری کمیشن اس معاملے کی تحقیقات نہیں کر سکتا۔ چیف جسٹس کو ادارے کی سطح پر معاملہ حل کرنا چاہیے۔

سابق چیف جسٹس نے ان پر اعتماد کا اظہار کرنے پر چیف جسٹس قاضی فائز عیسیٰ اور جسٹس منصور کا شکریہ ادا کیا۔

ہفتے کے روز حکومت نے ججوں کے الزامات کی تحقیقات کے لیے ایک انکوائری کمیشن تشکیل دیا تھا اور جسٹس (ر) تصدق حسین جیلانی کو اس کا سربراہ مقرر کیا تھا۔

ہفتہ کو وفاقی کابینہ نے تقرری کی منظوری دی تھی۔ وفاقی وزیر قانون اعظم نذیر تارڑ اور اٹارنی جنرل منصور عثمان اعوان کو کمیشن کے ٹرمز آف ریفرنس (ٹی او آرز) کی تیاری کا کام سونپا گیا تھا۔